Pidato pasambahan baralek

Penulis: Roby Gusnadi 

(DARI SIPANGKA)

AMPUN LAH AMBO DEK PANGULU, NAN GADANG BASA BATUAH, NAN TAU CADIAK PANDAI, CADIAK KA TAMPEK RANG BATANYO, PANDAI KABAKEH RANG BAGURU, TIANG ADAT SANDI HALUAN, PANYUANG PANJI MARAWA BASA. HULU AIA KUMPULAN BULUAH, PUSEK JALO KUMPULAN TALI, KANDUA JALO KUMPULAN IKAN, NAN BAK IBARAT KAYU GADANG DITANGAH KOTO, NAN BAUREK TAGUAH KA BUMI, NAN BAPUCUAK BADAUN RIMBUN, BABUAH BABUNGO LABEK, BUNGO PAMENAN DEK RAJO-RAJO, BUAH MAKANAN DEK RANG BANYAK, AIANYO TAWA SAJUAK DI MINUM, SAJUAK ANGGOTO KA TUJUAHNYO, PANAWA SAGALO RUNGGO HATI, LAKEK PITUAH DEK RANG TUO, PUNTIANG TASISIAK DEK HULUNYO, DIBAWAH KUMPULAN TALI,ASA RUNDINGAN NAN DAHULU, TIGO LIMBAGO NAN TAJADI, MANO LIMBAGO NAN TIGO TU, NAN PARTAMO SAMBAH MANYAMBAH, NAN KADUO SIRIAH JO PINANG, NAN KATIGO BASO JO BASI, BANAMO ADAT SOPAN SANTUN, ADAT DI LAWIK BAJURU MUDI, ADAT DI SABUANG BAJUARO, ADAT DI ALEK BARAJO JANANG, PIYAK KADIRI SI RAJO JANANG, NAN CAPEK KAKI NAN RINGAN TANGAN, CAPEK KAKI INDAK PANARUANG, RINGAN TANGAN INDAK PAMACAH, APO TANDONYO CAPEK KAKI INDAK PANARUANG, RINGAN TANGAN INDAK PAMACAH, IKO MAH LAH TAGAK DI HADAPAN KITO NAN BASAMO, LAKEK KUPIAH DI KAPALO, TAKANAK SI SAMPIANG TANUN ARAB, BUGIH MAKASAR RANG NAMOKAN, LALU DI TATIANG PIRIANG JO GALEH, KA HADAPAN KITO NAN BASAMO, KOK JARANG SAMO JARANGNYO, KOK RAPEK SAMO RAPEKNYO,LEMBAK NAN DARI PADO ITU, AIA LAH SUKO KA DI MINUM, NASI LAH RELA KA DI MAKAN, LAH BAK IBARAT KAPA DI PALABUHAN, NAMPAKNYO LAH SAREK DEK MUATAN, MARILAH SAMO-SAMO KITO LAIAKAN...

SAKIAN SAMBAH NAN DI TIBOKAN KA BAKEH MAMAK/SUTAN /MALIN.

JAWAB SI ALEK IYOOOOO LAHH... BANAMO SAMPAI DEK SUTAN

BILANG LAH MALIN...

SAPANJANG BUAH KA BANARAN SUTAN ITU ALAH DALAM BARIH JO BALABEH, DI LINGKUANG ADAT JO PUSAKO, ITULAH KATO SABANANYO, MANURUIK ADAIK NAN BIASO, LIMBAGO GAYUANG CAPEK BASAMBUIK, LIMBAGO KATO KANCANG BAJAWAB, SABALUN GAYUANG KA BASAMBUIK, SABALUM KATO KA BAJAWAB, LAH BAK PITUAH URANG JUO, MAH SUTAN, NAN BAK IBARAIK BURUANG PIPIK TABANG KA PADANG RIBU-RIBU, IYO KA RIMBO NAN SATUMPAK, ASAH TIBO BADAN DI SINAN, DI MINUM LAH AIA NAN SARAGUAK, SAJUAK NAN BUKAN ALANG KAPALANG, SAJUAK ANGGOTO KATUJUAHNYO, TAPI SUNGGUAH SAMANTANG PUN BAITU, SABALUN KAKI KA BASITUMPU, SABALUN SAYOK KA DI KIRAI, IKO PITUAH DI TIBOKAN KA BAKEH SUTAN, KA BAGAIMANO KO LAH KIRO-KIRO DEK SUTAN.

IIIYYOOOO LAAHHH... BANAMO SAMPAI DEK SUTAN

BILANG LAH MALIN.

SAPANJANG BUAH KABANARAN SUTAN ITU, ALAH DI DALAM BARIH JO BALABEH, ALAH DI DALAM ADAIK JO PUSAKO, ITULAH KATO SABANANYO, NAMPAKNYO SAPANJANG BUAH KABANARAN SUTAN ITU, ALAH IYO PULO MAH KIRONYO, TANTANGAN DI GAYUANG KA MANYAMBUIK, TANTANGAN DI KATO KA MANJAWAB, KA DI AMBIAK RUNDIANG JO BAIYO, KA DI BAOK KATO JO MUFAKAT, IYO BANA BAITU KATO SUTAN ? (YO BANA MALIN) DEK LAI DOH ASAH KATO SURANG LAI KA DI BULEKTI, DUO BATIGO LAI KA DI PAIYOKAN, ALAH BANAMO KAJI DI DALAMNYO, MAKO MANYIMAK AMBO DI SIKO,

(MAMPAIYOKAN KATO 1....)

MA SUTAN ? ,,YOOOO LAAHH... KA BAKEH SUTAN SAMBAH DI TIBOKAN ...

YOOO MANITAHLAH...

DI AWA KALAM NAN SAPATAH, DI MEDAN BUNGO NAN SATANGKAI, SALAM TAJELO KANAN RAPEK ,SAMBAH TATABUA KA NAN BANYAK, DI HULU MUARO SANI, SARASAH SUCI BABULAKAN, TAKUIK DI RAGI KA BATUKA, RUSUAH DI RINTIAK KA BATIMBANG, ELOK DI TARIAK UJUIK JO MUKASUIK, ARATINYO BANA, NAN KA JADI UJUIK JO MUKASUIK, DEK KARANO LAH MANITAH SILANG NAN BAPANGKA, KA BAKEH KITO SI JAMU ALEK, MANURUIKNYO ADAIK NAN BIASO, KOK LIMBAGO GAYUANG LAKEH BASAMBUIK, LIMBAGO KATO KANCANG BAJAWAB, BAA DI NAN SAKARANG IKO KINI, KOK GAYUANG YO ALUM BASAMBUIK, KOK KATO ALUM BAJAWAB, TANTANGAN DI GAYUANG NAN KA MANYAMBUIK, TANTANGAN DI KATO KA MANJAWAB, DIMA KATIBONYO, NAN BAK PADI DIMA KA TUMBUAHNYO, NAN BAK BIJO, YO NAK BAPANCARIAN SUTAN/MALIN DISINAN A..

YOOO LAHHH BANA SAMPAI DEK SUTAN.

BILANG LAH MALIN (MAMPAIYOKAN 2)

SAPANJANG BUAH KABANARAN SUTAN TADI, NAN TALAYANG KA TANGAH-TANGAH, NAN TALIMPAH KA MUKO RAPEK,TATUMPAH KA BAKEH BADAN DIRI AMBO, KOK DI DANGA BUNYI NYO BAIAK, DI PANDANG RUPONYO ELOK, JO KOK BASIANG DI NAN TUMBUAH, JIKOK MANIMBANG DI NAN ADO, TUMBUAH SARUPO IKO KINI, MANURUIK PITUAH SUTAN TADI, DEK KARANO LAH MANITAH SILANG NAN BAPANGKA, JO MALAH KARAJO NAN BAPOKOK, ADOK KA KITO SI JAMU ALEK, TANTANGAN DI GAYUANG KA MANYAMBUIK, TANTANGAN DI KATO KA MANJAWAB, NAK BAPANCARIAN AMBO DI SIKO, IYO BANA BAITU KATO SUTAN..?

YOO BANA MALIN,

INSYAALLAH AMBO AMBIAK KATO JO BAIYO, AMBO BAO RUNDIANG JO MUFAKAT, MANANTI MALIN SAKUTIKO,

(IYO AMBO MANANTI SUTAN)

JADI MALIN ........... KA BAKEH MALIN SAMBAH DI KUMBALIKAN,

ARATI BANA SAMBAH NAN AMBO KUMBALIKAN, KA BAKEH MALIN, ANTARO PARUNDIANGAN MALIN JO AMBO TADI, PANEK MANJADI PARANTIAN, PATANG MANJADI PAMALAMAN, SAHARAGO DUDUAK NAN BAIYO, SAHARAGO TAGAK NAN BAMOLAH, BAA KOK DEK AMBO LAH NAMONYO, KOK DUDUAK ALAH BAIYO, KOK TAGAK ALAH MOLAH, MANCARINYO SENTEANG KA BABILAI, MANCARINYO KURANG KA BATUKUAK, BAA DI NAN SAKARANG IKO KINI, KOK SENTEANG ALAH BABILAI, KOK KURANG ALAH BATUKUAK,

BAA KALULAAN SENTEANG KA BILAINYO, KURANG KA TAMBAHNYO, TANTANGAN DI GAYUANG KA MANYAMBUIK, TANTANGAN DI KATO KA MANJAWAB,DEK KARANO PANEH LAH BAASA, UJAN LAI BAPUHUN,

DEK KARANO SIRIAH LAI BA GANGGANG, DEK PINANG LAI BATAMPUAK, SURUIKKAN LAH SIRIAH KA GANGGANGNYO, PINANG KA TAMPUAKNYO, KATO KA MULONYO, SAKIAN SAMBAH KA BAKEH MALIN,  IYOOO LAAHH.... BANAMO SAMPAI DEK SUTAN..

BILANG LAH MALIN...

SAPANJANG BUAH KABANARAN SUTAN ITU, ALAH DI DALAM BARIH JO BALABEH, DI LINGKUANG ADAT JO PUSAKO, ITULAH KATO SABANANYO, MANURUIK PITUAH SUTAN TADI, TANTANGAN DI GAYUANG KA MANYAMBUIK, TANTANGAN DI KATO KA MANJAWAB, SURUIK KAN LAH SIRIAH KA GANGGANGNYO, PINANG KA TAMPUAKNYO, KATO KA MULONYO, YO BANA BAITU KATO SUTAN,..

KOK IYO BAITU KATO SUTAN, DENGAN INSYAALLAH, NAK AMBO SURUIK KAN MOLAH SIRIAH KA GANGGANGNYO, PINANG KA TAMPUAKNYO, KATO KA MULONYO, AKAN TATAPI SUTAN, KOK IYO KA AMBO SURUIK KAN  KATO KAMULONYO, IYO DIKAJI MALANG JO MUJUA NYO, SUTAN A...

YOOOO JADILAH MALIN

IYO KOK DIKAJI TANTANG KAMUJURAN NYO, SUTAN MALAPEH LAH BAK IBARAT URANG MAYAMUA MAH SUTAN, JAMUA TAKAKA, PANEH TIBO, BIJO TASERAK HUJAN DATANG, AKAN TATAPI KOK DIKAMALANGNYO SUTAN MALAPEH, JAMUA TAKAKA HUJAN TIBO, BIJO TASERAK PANEH DATANG, A KOK PITUAH NAN DITIBOKAN, KABAKEH SUTAN, KABAGAIMANO KO LAH KIRO-KIRO KO SUTAN. YOO ALAH BANAMO SAMPAI PULO MALIN, BILANGLAH SUTAN.

MANITAHLAH SUTAN,

SAPANJANG BUAH KABANARAN MALIN TADI, NAN AMBO SIMAK DARI SIKO, NAIAK KALANGIK JADI BINTANG, JATUH KABUMI JADI BIJO, TIBO DIRUMAH MANJADI ADAIT, NAN KAMANJADI ADAT JO LIMBAGO, MANURUIK PITUAH SUTAN TADI, APO PULO NAN MANJADI PITUAH DEK SUTAN, KABAKEH BADAN DIRI AMBO, TANTANGAN KA MANYURUIKKAN SIRIAH KA GANGGANGNYO, PINANG KA TAMPUAK NYO, KATO KA MULONYO, IYO DIKAJI MALANG JO MUJUANYO, KOK LAI MUJUA AMBO MALAPEH, LAH BAK SAUMPAMO URANG MANJAMUA, JAMUA TAKAKA PANEH TIBO, BIJO TASERAK HUJAN DATANG,AKAN TATAPI KOK MALANGNYO, AMBO MALAPEH, JAMUA TAKAKA HUJAN TIBO, BIJO TASERAK PANEH DATANG, KAN IYO BANA BAITU KATO MALIN ?

IYO LAH SUTAN.

INDAK LAI DOH MALIN, SAIGOLAH KA DISURUIKKAN KATO KASAMULONYO, KOK ANTARO AMBO NAN JO MALIN, KAN LAH BAK IBARAIK URANG BADUNSANAK, KOK SENTEANG KAN BIASO BILAI MAMBILAI, KOK KURANG KAN BIASO TUKUAK MANUKUAK, BAA DI NAN SAKARANG IKO KINI, SAPANJANG PITUAH MALIN  TADI, NAN BAK PITUAH MALIN A, ADAT NAN SAMO KITO PAKAI MALIN.

IYOOO LAH DEK AMBO KAN IYO MULUIK SUTAN SAPATAH ITU LAH AN AMBO NANTI, BA ARATI LAH GUGUA DARI TAMPUAK, KARANO LAH SAKAH DARI DAHAN, INSYAH ALLAH AMBO PALALU SUTAN.

(MAMULANGKAN KATO KA SAMULO DARI NAN KA DUO)

JADI MA... MAMAK SI PANGKA ? YOOO MALIN... KA BAKEH MAMAK SAMBAH DI KUMBALIKAN. YO MANITAHLAH MALIN.

 ARATI BANA SAMBAH NAN KA AMBO KUMBALIKAN KA BAKEH MAMAK, ANTARO PARUNDIANGAN MAMAK JO AMBO TADI, PANEK MANJADI PARANTIAN, SAHARAGO DUDUAK BAIYO TAGAK BA MOLAH, MANCARI SENTEANG KA BABILAI, MANCARI KURANG KA BATUKUAK, TANTANGAN DI GAYUANG KA MANYAMBUIK, TANTANGAN DI KATO KA MANJAWAB, BAA DI NAN SAKARANG IKO KINI, IYO LAH TATUMPAH KA BAKEH BADAN DIRI AMBO, TAPI SUNGGUAH PUN TATUMPAH KA BADAN DIRI AMBO, DEK AMBO TANTU KOK BAREK AMBO PIKUA, KOK RINGAN TANTU AMBO JINJIANG, TATAPI SUNGGUAHPUN BAREK KA AMBO PIKUA, RINGAN KA AMBO JINJIANG, AAAA YO NAK BAPITUAH MAMAK DI SINAN,

SAPANJANG BUAH KABANARAN MALIN TADI, ALAH DI DALAM BARIH JO BALABEH, DI LINGKUANG ADAIK JO PUSAKO, ITULAH KATO SABANANYO, LAH BAK IBARAT SURI TAGANTUANG NAN BATANUN, JALAN TABANTANG NAN BATURUIK, BAK SURI LIMBAGO ADAT, ADAT LAMO PUSAKO USANG, PUSAKO BAIAK BARUNGGUI, UKURANNYO CUPAK NAN USALLI, ISINYO GANTANG NAN TATAGAK, KA TALUAK TIMBUNAN OMBAK, KAPASIA TIMBUNAN BADAI, OMBAK BADABUA KA NAN DALAM, RIAK LAH PACAH KA NAN TANANG, BARIH TAKANAK DI PANGHULU, ADAT TAPAKAI DI NAN RAPEK,

PIAK KAPADO PANITAHAN, INDAK DI ATOK DI SUSUN BANA, HANYO NAN KAPA ATOK YO KAPANASAN,YO UJUANG SAMBAH KA BAKEH MALIN.

MANITAHLAH MAK.

ARATINYO NAN KA MANJADI UJUANG PANYAMBAHAN KA BAKEH MALIN, MANURUIK PITUAH MALIN TADI,TANTANGAN DI GAYUANG KA MANYAMBUIK, TANTANGAN DI KATO KA MANJAWAB, BAA JO KOK MALIN LAH NAMONYO, KOK KATO SURANG LAH DI BULEKTI, DUO BATIGO ALAH DI PAIYOKAN, KOK BAA NAN DI SAKARANG IKO KINI, ALAH BULEK AIA KA PAMBULUAH, LAH BULEK KATO KA MUFAKAT, IYO DI MALIN KA TIBONYO, BAA JIKOK DIRI BADAN MALIN, KOK BAREK KA BAPIKUA,KOK  RINGAN KA  BAJINJIANG, AKAN TATAPI SUNGGUAHPUN BAREK KA BAPIKUA, SUNGGUAHPUN RINGAN KA BAJINJIANG, NAK BAPITUAH AMBO DI SIKO, KAN IYO BANA BAITU KATO MALIN ?

IYOOOO MAK.

DEK LAI DI NAN SAKARANG IKO KINI, HINGGO LAH DI MALIN KA TIBONYO GAYUANG KA MANYAMBUIK, TANTANGAN DI KATO KA MANJAWAB,ALAH DI BARIH MA KA NAN PAEK, MALIN ALAH DI RAKUAK TIBONYO PANABANGAN, ALAH DI KAPUAK-KAPUAK LAKEK PARMATO, ALAH DI LAEH LAKEK ATOK NYO, MALIN AAA.

BILANGLAH ALAH MALIN,

IYOOO MANITAHLAH MALIN, BAA DI NAN SAKARANG IKO KINI, JO KOK DEK AMBO LAH NAMONYO, YO LAH MULUIK MAMAK NAN SAPATAH ITU AMBO NANTI, BAARATI LAH GUGUA DARI TAMPUAK, LAH SAKAH DARI DAHAN, TAPI SUNGGUAHPUN SAMANTANG PUN BAITU, SABALUN GAYUANG KA BASAMBUIK, SABALUM KATO KA BAJAWAB, SAPANJANG PITUAH MAMAK TADI, NAN AMBO SIMAK DARI SIKO, ELOK NAN INDAK BABINCANO, RANCAK SUSUNNYO NAN BAK SIRIAH, ELOK LIRIKNYO NAN BAK PAMBATUA, BAA DI NAN SAKARANG IKO KINI, PIAK KA DIRI BADAN AMBO, NAN BAK PITUAH URANG JUO, SABANYAK LUBANG KOK INDAK TAISI, SABANYAK BARIH INDAK TAPAEK, SABANYAK RAKUAK KOK INDAK TATABANG,

NAN BAK IBARAIK URANG MAMANJEK, KOK INDAK TATITIH TIOK DAHAN, KOK INDAK TALALAI LALU KA PUCUAK, KOK INDAK TAKUPIA TIOK RANTIANG, KO PITUAH DI TIBOKAN KA BAKEH MAMAK, BAGAIMANO PULO KIRO-KIRO ?

YO LAH SAMPAI DEK MALIN. BILANGLAH MAK, KA BAKEH MALIN JUO MOLAH,

MANITAHLAH MAK, ARATI NAN KA JADI PITUAH PULO DEK MALIN, ADOK KA BADAN DIRI AMBO, TANTANGAN DI GAYUANG KA MANYAMBUIK,TANTANGAN DI KATO KA MANJAWAB, KOK INDAK SABANYAK LUBANG NAN TAISI, KOK INDAK SABANYAK BARIH NAN TAPAUK, NAN IBARAIK URANG MAMANJEK, KOK INDAK TALALAI LALU KA PUCUAK, KOK INDAK TA TITIH TIOK DAHAN, KOK INDAK TAKUTIA TIOK RANTIANG, NAN BAPITUAH AMBO DI SIKO, YO BANA BAITU KATO MALIN ?

IYOOO LAH MAK.

INDAK LAI DO, KOK ANTARO AMBO NAN JO MALIN, TAPI LAH JALEH URANG BADUNSANAK, URANG SAADAT SAPUSAKO, SABARIH SABALABEH, INDAK KA BA UJI BANA SAMO MERAH, INDAK KA BATIMBANG SAMO BAREK, INDAK KA BAUKUA SAMO PANJANG, KOK PENDEK DI SIKO, KOK PANJANG BANA DI MALIN, INDAK KA BAA RASO KIRO-KIRO DEK MALIN,

AAA KA BAKEH MAMAK JUO MOLAH. MANITAHLAH MALIN, AMPUN BARIBU KALI AMPUN, BAKEHNYO AMBO MINTAK AMPUN, LALU KA LABUAH KA TAPIAN, SAMPAI KA BALAI KA GALANGGANG, KA ATEH TA AMBUN JANTAN, KA BAWAH TAKASIAK BULAN, PASAK BASUNTIANG MATOHARI, BUNGO MARAJAM TIOK TANGKAI, KALIK BASANDA ASO-ASO, BUAHNYO HITAM, NAN SABATANG AMEH,BAIAK PUTARAN JARUM, MANGKO TASABUIK DI KATO NAN DUO, MANONYO KATO  NAN DUO TU, PARTAMO KATO BASYARIAT, KADUO KATO BAHAKIKAT, JO KOK DI TILIAK KATO BASYARIAT, LAH TARANG JALAN KA KITO TAMPUAH, LAH NYATO ADAT KA KITO PAKAI, JO KOK DI TILIAK KATO BAHAKIKAT, TASADIK KAN DI HATI, DI LAYIAKAN DI NAN BASAMO, BUAH TANGAN PAMENAN ADAT, LAINNYO JADI KATOLONGAN, BATIN SAMO NIKMAT DI DALAM KAMPUANG.

MANURUIK DI ALEK MAMAK NAN KO, MAMAKAI DIRI SI RAJO JANANG, PIAK KA DIRI SI RAJO JANANG, NAN CAPEK KAKI NAN RINGAN TANGAN, CAPEK KAKI INDAK PANARUANG, RINGAN TANGAN INDAK PAMACAH. APO KATANDONYO CAPEK KAKI INDAK PANARUANG, RINGAN TANGAN INDAK PAMACAH, KO MALAH NAN TAGAK DI HADAPAN KITO NAN BASAMO, LAKEK KUPIAH DI KAPALO, TAKANAK SI SAMPIANG TANUN ARAB, BUGIH MAKASAR RANG NAMOKAN, LALU DI TATIANG PIRIANG JO GALEH, KA HADAPAN KITO NAN BASAMO, KOK GALEHNYO ALAH JALEH BARISI AIA, KOK PIRIANGNYO LAH JALEH BARISI NASI, AIA LAH SUKO KA DI MINUM, NASI LAH RELA KA DI MAKAN, BAK IBARAIK KAPA DI PALABUAHAN,KAPA LAH SAREK DEK MUATAN, MARILAH SAMO KITO LAIAKAN, BANA BAITU KATO MAMAK, KOK IYO AIA KA DI MINUM, KOK NASI LAH  KA DIMAKAN, NAN BAK PITUAH URANG JUO, LURUIHLAH JALAN PAUAH KAMBA, BABELOK JALAN KA LUBUAK ALUANG,DALAM DAERAH PARIAMAN, MULAI LAH DEK MAMAK DI SIPANGKA, NAK KAMI MANAKUAK SAMPAI KA UJUANG, NAK SANANG HATI SIPANGKALAN,